Oberaffengeiler Remstäler Hefezopf
Mr brauchd
Zwoiahalb Stond Zeit, a Küche mit ma Bachofa (Ober- ond Onderhitzfähig), zwoi schaffige Hend ond en haufa Luschd ond Laune.
Zutata
700g Woiza-Meal 405er, 300g Woiza-Meal 1050er, 120g Zucker, 100g Buddr, oin Bechr Sahne, oin Dopplpack griebena Zitronaschala, (Dr. Oetker "Finesse"), oin Wirfl Hefa, anderthalb gstrichane TL Salz, oi Oigelb, wers mog a Had voll Zibeba (zu hochdeutsch Rosinen), ond a graoßa Schissel mit Deggel.
Sodale, jetzad gahts los
Händ wäscha, na Meal en dSchissel nai sieaba, Zucker, Salz, griebena Zitronaschal dazu nai, guad mit ma Leffel mischa, en dMidde a kloina Mulde macha ond dHefa neibroggla, an guada Schugger Milch (100ml) drzua, dr Deggel druff ond zäa (10) Minuda standa lassa. Na dr Budder, dSahne ond an guader Schugger Milch (100ml) nei, guat mit de Händ kneta ond doiga, emmer wieder a Milch drzua, bis dr Doig nemme an de Händ ond an dr Schissel kleba bleibt. Isch dr Doig fescht ond no gschmeidig drzua, na ischs fei! Aus dem Doig a Kugl forma, dr Boda vo dera Schissel leicht mit Meal bestaiba, dia Doigkugel en dMitte platziera ond oba au nomal mit a bissle Meal bepudra. Jetzed dr Deggel druff ond ama warma Plätzle so lang ganga lassa, bis sich dia Doigkugel verdoppelt hot. Des dauert so ana dreiviartel Stond (3/4 Std), dArbeitsplatt leicht ausmehla ond a silbrigs Bachblech ausglegt mit ma Boga Backpapier narichta.
Bis dr Doig ganga isch, ka i mei dreggichs Gschirr spüala, oder a guata Tass Kaff drenka oder i gang ens Internet ond guck, was es Neis geit bei "Frag Michi", äääh "Frag Mutti" heißts natürlich. Isch dr Doig guat ganga, holt mern aus dr Schissel, gibt, wer mag no dia Zibeba nei ond duat den Doig nomal kraftvoll durchkneta, teilt en en drei etwa gleich graoße Stückla, formt da draus drei ca fuffzig Zentimeter lange Sträng ond flechtet da draus dr Zopf. I leg mir dia Sträng nebranander na, fang en dr Mitte a, flecht bis zom End, dreh en vorsichtig en die ander Richtong ond flecht na vollends fertig. Den feriga Zopf an boide Enda packa ond diagonal aufs Blech hieva. Den Oidotter mit ra Gabl verquirla ond mit ma breita Bensel ganzflächig astreicha. Nach Beliaba mit Hagelzucker ond Mandelblättla liabevoll garniera. Bachofa auf 180 Grad Celsius (Ober- ond Onderhitz) eischalta ond nach zäa (10) Menuta des Weißblech en die 2. Schiene von onta neischieba. Nach etwa 40 Menuta, wenn dr Zopf schee goldbraun isch, dr Ofa ausschalta ond dr Zopf no faif Menuta dren lau.
Sodele, jetzed kasch dTür aufmacha ond mit zwoi Topflappa des millionisch hoiße Blech mit dem Prachtexemplar (siehe Foto) ama geeignata Plätzle auskühla lassa. Dia Okoschta vo dem Prachtexemplar ca. 3,50 Euro inkl. Strom.
Größe roicht aus für a 6-kopfete Familie. I wensch euch an Guata ond verabschied mich mit dem schwäbischen Gruß "Lecket mi am A ... ond bleibet gsond"!